Nina benkayishana kaMenzi eyaphuza umlaza ngameva. Nina benyathi kaNdaba ejame ngomkhonto phezu koMzimvubu. Nina bakaBhejane ophuma esiqiwini kade bekuvalele. Siyakhuleka! Kulokhu sikhuleka ngananku umsebenzi wesizwe eziwupheke sawudidiyela ngaphansi kobuciko obubhalwayo okuyizindaba ezimfishane. Eqinisweni lilonke nje kufanele kube nendlala emkhakheni wobuciko sibala nazo izindaba ezimfishane ngolimi lwesiZulu. Njengoba sithi: Kujiyelene Kwamhlaba , sikuphathele umzamo wethu wokuqala kulo munxa nakuba ungowesibili emibhalweni emkhankasweni wethu wokulwa nokuqeda indlala nesizungu okukhungethe abafundi kwezobuciko obubhalwayo.
Okuseqhulwini emkhankasweni wethu wobuciko yikho ukuba sithuthukise ulimi lwesiZulu, siphinde sivuselele uthando lokufunda nokubhala ebantwini ngokwehlukana ngamazingo empilo. Lapha-ke sigabe ngezindaba ezigxile kakhulu kulokho okwenzeka kuwonkewonke emhlabeni jikelele ngobubanzi bawo. Umfundi angalindela izigigaba nezigameko ezenzeka ebantwini mihla namalanga okubalwa; ukuhlalisana kwabantu, izimo abahlangabezana nazo, amaphutha abawenzayo empilweni nokunye okuningi. Konke lokhu kuletha isithombe sokujiya kulomhlaba kwabathile ngenxa yenkambo yabo yempilo.
Ulimi olusetshenziswe lapha lungolunothe kakhulu ngezimo zokukhuluma kanye nokudlalisela ngamagama. Zingeze zachazwa kalula ngomlomo izifundo eziyofunyanwa ngumfundi nomfundi kuleli bhuku. Ngenxa yokujula kwezindaba ezikuleli bhuku sesingakuqinisekisa ukuthi nakanjani zizokushiya ubambe ongezansi. Ziyafundisa, ziyeluleka ziphinde zexwayise. Zifundele nawe uzizwele ukuthi umhlaba ubafaka kusiphi isikole labo abawukha kancane njengogwayi wamakhala.
Reviews
There are no reviews yet.