AbakwaNkosi, Ndlangamandla, neNkosi uMkhunjini kaNqabeni kaZwelifayo by A.H. Nkosi

“Ngifune itshe likamama lokugaya kanye nembokodo yalo emanxiweni akithi, ezaleni lomuzi lapho kulele khona yona intombi kaDlamini, ukaNkulankula kaNobhakada, kaBhukwana, kaNgwane iNgonyama yamaSwazi. Nantiya ithuna lakhe, nantiya eduze kwelikamkhulu, onguyisezala wakhe, naziya
iziza zezindlu zonkana zomuzi owawumukhulu, nasiya nesiza sesibaya sezinkomo, nasiya nesesibaya samathole, nasiya nesesibaya sezimbuzi. Kodwa lutho ukulithola itshe likamama ayengigayela kulo umcaba wamabele. Kubalulekile ukuthi isizwe nesizwe sikwazi ukulonda amagugu aso ukuze izizukulwane ezizayo ziyokwazi ukusizakala kalula. Nani-ke boNkosi nginiphonsela inselelo kulokhu.”